اسلام آباد۔30اگست(اے پی پی) سپیکر قومی اسمبلی راجہ پرویز اشرف ملک اچ ایشیا کپ کوں خوش آئند قرار ݙیندے ہوئیں شرکت سانڳے پاکستان آوݨ آلیاں سبھےکرکٹ ٹیماں دا خیر مقدم کیتے ۔ آپݨے ھک بیان اچ انہاں آکھیے پاکستان اچ 15 سال بعد ایشیا کپ تھیوݨ ٻہوں چنڳی ڳالھ اے ۔ ایشیا کپ اچ شرکت سانڳے پاکستان آوݨ آلیاں ٹیماں کوں خوش آمدید آکھداں۔ انہاں توقع ظاہر کیتی جو پاکستان اچ ایشیا کپ خوشگوار ماحول اچ تھیسی اتے شرکت کرݨ آلیاں ٹیماں چنڳی کاکردگی ݙکھیسن ۔پاکستانی شائقین کرکٹ کوں آپݨے کرکٹ گرائونڈز اچ کرکٹ دی چس چاوݨ دا موقع ملسی ۔سپیکر قومی اسمبلی ایشیا کپ اچ شرکت کرݨ آلیاں ٹیماں کیتے نیک خواہشات دا اظہار کیتے ۔ سپیکر قومی اسمبلی ایشیا کپ دے پاکستان اچ تھیوݨ دے سلسلے اچ پاکستان کرکٹ بورڈ دیاں کوششاں دی تعریف کیتی تے ایشیا کپ دی پروقار افتتاحی تقریب کراوݨ تے چیئرمین پاکستان کرکٹ بورڈ اتے مینجمنٹ کوں مبارخ ݙتی ۔
.jpg)
