اسلام آباد۔6اکتوبر (اے پی پی):سپریم کورٹ نیب ترامیم دے خلاف عمران خان دی دائر درخواست دی سماعت دے موقع تے سوال چاتن جو عدالت توں ݙتی ڳئی سزا قانون سازی نال کیویں مک سڳدی اے ؟ صدر وی رحم دی اپیل اچ صرف سزا ہی معاف کرسڳدن مگر جرم ول وی ختم نی تھیندا ۔ پلی بارگین جرم دی بنیاد اے ،جے او ہی مک ونڄے تاں ول جرم کیویں برقرار رہسی ؟ خمیس کوں عدالت عظمٰی اچ درخواست دی سماعت چیف جسٹس پاکستان جسٹس عمرعطا بندیال دی سربراہی اچ عدالت عظمیٰ دے ترائے رکنی بنچ کیتی ۔ ایں موقع تے عمران خان دے وکیل خواجہ حارث آپݨے دلائل جاری رکھیندے ہوئیں موقف اپنائے جو ترمیم دے تحت دٻائو دا الزام سامݨے آوݨ تے پلی بارگین منسوخ تھی ویسی ۔ پلی بارگین منسوخ تھیوݨ تے ایندے تحت جمع کرائی ڳئی رقم واپس کرݨی پوسی ، ایں موقع تے جسٹس اعجاز الاحسن سوال کیتے کیا پلی بارگین منسوخ تھیوݨ نال سزا دے نال جرم وی ختم تھی ویسی ؟ پلی بارگین اعتراف جرم ہوندے جیں دی سزا اچ عدالت پیسے واپس کرݨ دی منظوری ݙیندی اے ۔ خواجہ حارث عدالت کوں ݙسائے جو ترمیم دے تحت جرم تے سزا ݙوہیں ہی مک ویسن ۔ ترامیم اچ کابینہ تے ٻئے فورمز دے نال نال وزراء اتے معاونین خصوصی کوں وی استثنی ݙتا ڳئے۔ انہاں آکھیے نیب ترامیم دا اطلاق ٻاہرلے ملک اثاثیں تے وی تھیسی ۔ کرپشن ملزمان کوں تحفظ ݙیوݨ کیتے ترامیم دے ذریعے پورا پورا بندوبست کیتا ڳئے ۔ جسٹس اعجاز الاحسن آپݨے ریمارکس اچ آکھیے جو کرپشن 50 کروڑ روپے توں گھٹ ہووے تاں پلی بارگین نال مقدمہ وی ختم تھی ویسی ۔ ترمیم توں ظاہر تھیندے جو 49 کروڑ روپے تئیں کرپشن ٹھیک ایں توں ودھ غلط اے۔ انہاں ترامیم اچ 500 ملین دا بینچ مارک بݨا ݙتا ڳئے ۔ جسٹس سید منصور علی شاہ ریمارکس ݙتے قاتل دا جرم ختم تھی سڳدے تاں بدعنوانی دے ملزم دا کیوں ختم نی تھی سڳدا ۔ چیف جسٹس عمر عطا بندیال ایں موقع تے پچھیے جو کیا ایمنسٹی سکیم دا فیدہ چاوݨ آلا عام آدمی وی نیب ریڈار تے آ سڳدے؟ ایجھا معاشرہ اے جو کاروباری لوکاں کوں کئی جاہ تے رشوت ݙیوݨی پوندی اے ۔ کیا کاروباری لوکاں کوں کاروبار کرݨ تے وی سزا ملسی ؟ خواجہ حارث موقف اپنائے جو عوامی عہدیدار دی منی لانڈرنگ اچ سہولت کاری کرݨ آلا نیب ریڈار تے آسی ۔
