اسلام آباد۔13مارچ (اے پی پی):وفاقی وزیر منصوبہ بندی ترقی اتے خصوصی اقدامات پروفیسر احسن اقبال بدھ دے ݙینھ نیشنل یونیورسٹی آف سائنس اینڈ ٹیکنالوجی (نسٹ) دے نیشنل سینٹر آف آرٹیفیشل انٹیلی جنس(اے آئی) دا دورہ کیتے تے اینکوں مزید چار سینٹرز اچ کماں دی پیشرفت دا جائزہ وی ڳھدا ۔ اے سینٹرز روبوٹکس، سائبرسیکیوریٹی، بگ ڈیٹا اتے کلاؤڈ کمپیوٹنگ دے شعبیں اچ کم کریندے پئن جنھاں بنیاد احسن اقبال رکھی ہئی۔وزارت منصوبہ بندی توں جاری بیان موجب دورے دے موقع تے ریکٹر نسٹ انجینئر جاوید محمود بخاری اتے ٻئے حکام وفاقی وزیردا استقبال کیتے جݙاں جو وفاقی وزیر کوں سینٹرز بارے ہݨ تئیں دی پیشرفت بارے ھک جامع بریفنگ وی ݙتی ڳئی۔ ایں موقع تے احسن اقبال آکھیے ایچ ای سی دی صحیح رہنمائی نال اے سینٹرز اقتصادی ترقی سانڳے مصنوعات دی کمرشلائزیشن اتے ڈیجیٹل برآمدات دے ذریعے ملکی معیشت کوں ترقی ݙے سڳدن۔ جدید ٹیکنالوجی عالمی سطح تے معیشتاں اچ ریڑھ دی ہݙی دی حیثیت رکھیندی اے تے دنیا دے ٻہوں سارے ملکاں آپݨی قومی تبدیلی سانڳے آرٹیفیشل انٹیلی جنس اچ زیادہ سرمایہ کاری شروع کرݙتی اے پاکستان کوں ایندے اچ آپݨا بھرپور کردار نبھاوݨاں ہوسی ۔
