اسلام آباد۔6اگست (اے پی پی) وزیر پارلیمانی امور ڈاکٹر طارق فضل چوہدری آکھیے جو “وفاقی حکومت کہیں مخصوص علاقے یا قبیلے دے خلاف ٹارگٹڈ آپریشن نی کریندی پئی۔” انہاں ایجھے دعویں کوں بے بنیاد اتے قومی اتحاد کوں ضیان پڄاوݨ آلا قرار ݙتا۔ قومی اسمبلی اچ مختلف ارکان ولوں چاتے ڳئے نکتیں دا جواب ݙیندیں انہاں آکھیا جو “پاکستان لمبے عرصے توں دہشت گردی دے خلاف جنگ اچ ساریں توں اڳوں اے، نہ صرف آپݨے شہریاں کوں بلکہ پورے دنیا کوں وی عسکریت پسندی دی لعنت توں بچاوݨ کیتے ہک “آہنی دیوار” وانڳوں کھڑے۔” انہاں آکھیا جو “پاکستان دہشت گردی دے خلاف جنگ اچ بے پناہ قربانیاں ݙتن۔” انہاں مزید آکھیا جو “جتھاں دہشت گردی دے واقعات ہوندن اتھاں کارروائیاں کیتیاں ویندیان۔” وزیر پارلیمانی امور ریاستی اداریں اتے قبائلی عوام وچال ونڈ پیدا کرݨ دی کوششاں دے خلاف خبردار کریندیں زور ݙتا جو ایں طرح دے بیانیے صرف ملک دے دشمناں دے مفادات کوں پورا کریندن۔ڈاکٹر طارق فضل چوہدری ایں ڳالھ تے زور ݙتا جو دہشت گردی دے خلاف جنگ ہک اجتماعی قومی جدوجہد اے جیں کیتے کہیں فرقے، صوبے یا نسل دی تفریق دے بغیر اتحاد دی لوڑھ اے۔ انہاں ایں لڑائی اچ قبائلی عوام کوں انہاں دی قربانیاں تے خراج تحسین پیش کیتا اتے ملک دے دفاع اچ انہاں دی اوکھ دا اعتراف کیتا
