اسلام آباد۔15اگست (اے پی پی) وفاقی وزیر منصوبہ بندی، ترقی و اصلاحات و خصوصی اقدامات پروفیسر احسن اقبال آکھیے جو “پاکستان دی پائیدار ترقی دے رستے اچ ساریں توں وݙا چیلنج آبادی اچ تکھے ودھارا، غذائی قلت اتے سٹنٹنگ اے جیں دا براہ راست تعلق غربت اتے وسائل دی کمی نال بݨدے۔ ایڈوانس سٹریٹجک پاپولیشن ڈویلپمنٹ فریم ورک تقریب نال خطاب کریندیں انہاں آکھیا جو ملک دے پسماندہ اتے دیہی علاقیں اچ تریمتاں دی وݙی تعداد آئرن ڈیفیشنسی اتے غذائی قلت دا شکار اے جیں دے نتیجے اچ کمزور اتے ذہنی طور تے پسماندہ ٻالاں دی پیدائش دے امکانات ودھ ویندن۔ ایجھی صورتحال نہ صرف ماء دی صحت کیتے نقصان ݙیوݨ آلی اے بلکہ اڳوں آلی نسل دی جسمانی اتے ذہنی صلاحیتاں کوں وی متاثر کریندی اے۔ وفاقی وزیر آکھیے جے ٻالاں دی تعداد وسائل موجب ہووے تاں اساں انہاں کوں بہتر غذائیت، معیاری تعلیم، روزگار دے موقع اتے بہتر زندگی ݙے سڳدوں ۔ آبادی اچ توازن نہ صرف تعلیمی اداریں اتے صحت دیاں سہولتاں دی منصوبہ بندی اچ مددگار ہوسی بلکہ روزگار ݙیوݨ، سماجی امن اتے معاشی استحکام کوں وی یقینی بݨیسی۔ پاݨی دی کمی دے ودھدے خطرات تے ڳالھ کریندیں پروفیسر احسن اقبال آکھیے جو گزریل 30 توں 40 سالاں اچ فی کس پاݨی دی دستیابی اچ چار گنا توں ودھ گھٹ آئی اے۔ آبادی اچ مسلسل ودھارے دی صورت اچ پاݨی دی قلت، خشک سالی اتے غذائی بحران جیھے مسئلے سنگین تھی ویسن۔ انہاں واضح کیتا جو آبادی اچ ودھارے دی شرح تے قابو پاوݨ کہیں مذہبی تعلیم دے خلاف کائنی ، بلکہ قرآن مجید اچ وی ٻالاں دی پیدائش اچ وقفہ رکھݨ دی حکمت موجود اے۔ پروفیسر احسن اقبال آکھیے جو وزارت منصوبہ بندی دے سارے ترقیاتی منصوبیں دی بنیاد مستقبل دی آبادی دے حجم تے رکھی ویندی اے اتے پائیدار ترقی ایں ویلھے ہی ممکن اے جݙاں آبادی اتے وسائل اچ توازن قائم رکھیا ونڄے۔ وفاقی وزیر منصوبہ بندی، ترقی و خصوصی اقدامات احسن اقبال اسلام آباد اچ “آبادی اتے ترقی” متعلق نیشنل ورکشاپ نال خطاب کریندیں آکھیا جو آبادی دا مسئلہ صرف اعداد و شمار دا نئیں، بلکہ اے ملک دی ترقی اتے مستقبل کیتے ٻہوں اہم اے۔ انہاں آکھیا جو اساں کوں اے فیصلہ کرݨا اے جو اساں بھکی، بیمار اتے کمزور نسلاں پیدا کروں یا صحت مند، توانا اتے ذہین قوم تیار کروں۔ وفاقی وزیر اعداد و شمار پیش کریندیں ݙسیا جو پاکستان دی آبادی 24 کروڑ 10 لکھ توں لنگھ چکی اے اتے 2050ء تئیں ایں دے 38 کروڑ 50 لکھ تئیں پڄݨ دا امکان اے۔ ایں ویلھے ملک دی 68 فیصد آبادی 30 سال توں گھٹ عمر دی اے جیڑھی قومی ترقی دا ہک قیمتی اثاثہ اے۔ انہاں آکھیا جو ساݙا دین آبادی دے نظم و ضبط دے خلاف کائنی اتے اڄ دے دور اچ کہیں قوم دی اصل طاقت ایں دی ذہنی صلاحیت اتے مہارت اچ ہوندی اے، نہ جو صرف تعداد اچ۔ آبادی اچ تکھی رفتار نال ودھارے نال روزگار، صحت عامہ، خوراک اتے پاݨی دی دستیابی جیھے اہم شعبیں کوں شدید خطرے لاحق تھی سڳدن۔ پروفیسر احسن اقبال زور ݙتا جو ٻالاں دی تعداد اتے موجود وسائل اچ توازن قائم کر تے انہاں دی صحت اتے معیار زندگی بہتر بݨایا ونڄ سڳدا اے۔ ایں مقصد کیتے وفاق اتے صوبیں کوں پالیسی دے تسلسل اتے وسائل دی منصفانہ ونݙ یقینی بݨاوݨی ہوسی۔ انہاں آکھیا جو تریمتاں دی ورک فورس اچ شمولیت کوں 50 فیصد تئیں ودھاوݨ ضروری اے تاں جو معیشت اچ بھرپور حصہ پاتا ونڄ سڳے۔ آبادی دے مسئلے تے موثر حکمت عملی کیتے وزیراعظم دی ہدایت تے ہک خصوصی کمیٹی تشکیل ݙتی ڳئی اے جیڑھی سارے صوبیں نال مشورہ کریسی اتے اڄ دی ورکشاپ دیاں سفارشات کوں عملی فریم ورک اچ شامل کیتا ویسی
.jpg)
